Viðtøkur Fyri Tórshavnar Golffelag

§ 1

Navn felagsins er Tórshavnar Golffelag, og heimstaðurin er Tórshavnar kommuna.

2. stk.: Endamál felagsins er at fáa til vega eina golfbreyt, standa fyri rakstrinum av henni og at skipa fyri tí spæli, sum á henni fer fram, so at limir felagsins kunnu íðka golfítróttina undir teimum best møguligu umstøðunum.

3. stk.: Felagið er limur í Golfsambandi Føroya, GSF.

§ 2

Bæði hvílandi og virkandi limir kunnu verða tiknir upp.

2. stk.: Innliman fer fram við skrivligari áheitan til nevndina.

§ 3

Limagjaldið verður ásett á aðalfundinum. Nevndin setir fram uppskot, og limabólkarnir eru hesir:

1. 1.       Juniorar (undir 18 ár)
   2.       Ungdómar (18 – 25 ár)
   3.       Vanligir limir (26-67)
   4.       Hjún
   5.       Pensjónistar (yvir 67 ár)
   6.       Pensjónistahjún
   7.       Uttanlands limir
   8.       Hvílandi limir

2. stk.: Tá ið virkandi limir verða tiknir upp í felagið, lata teir eitt av aðalfundinum samtykt innskot.

3. stk.: Juniorar lata einki innskot. Ungdómslimir lata 1/3 av ásetta innskotinum, og tá teir gerast vanligir limir 2/3.

4. stk.: Hvílandi limir, sum áður hava verið virkandi limir, kunnu aftur gerast virkandi limir uttan at lata nýtt innskot.

5. stk.: Tað innskot, sum limir hava latið, kann ikki verða kravt aftur, um limur fer úr felagnum.

6. stk.: Nevndin skipar fyri uppkravi av innskoti og limagjaldi.

7. stk.: Limaskapur er bindandi fyri eitt ár og útmeldan kann bara fara fram skrivliga til ein 1. januar.

8. stk.: Hevur limur eina limagjaldseftirstøðu upp á meira enn 3 mánaðir, verður hann strikaður, uttan so at nevndin heldur rímiliga orsøk vera fyri, at kravið ikki er goldið. Hann kann ikki verða tikin uppaftur, fyrr enn øll eftirstøðan er goldin.

§ 4

Aðalfundurin er hægsti myndugleiki felagsins.

2. stk.: Vanligur aðalfundur verður hildin í Tórshavnar kommunu hvørt ár, innan mars mánaður er úti. Innkalling skal fara fram við í minsta lagi 14 daga varningi við telduposti og lýsing á heimasíðu felagsins.

3. stk.: Aðalfundurin velur ein fundarstjóra, sum ikki er nevndarlimur, til at stíla fyri fundinum.

4. stk.: Bara virkandi limir, sum eru myndugir, hava atkvøðurætt. Hvør limur hevur eina atkvøðu, og tað er ikki loyvt at greiða atkvøðu við fulltrú.

5. stk.: Vanligur meiriluti ræður, har hesar viðtøkur ikki áseta annað.

6. stk.: Skrivlig atkvøðugreiðsla skal fara fram, um ein limur við atkvøðurætti krevur tað.

7. stk.: Verða fleiri uppskot sett fram í sambandi við val, enn veljast skulu, verður skrivlig atkvøðugreiðsla at nýta eftir hesum reglum: Atkvøtt verður um allar sessirnar í senn. Hvør limur við atkvøðurætti kann í mesta lagi greiða eina atkvøðu fyri tí tali av umboðum, sum skal veljast, og bara greiða eina atkvøðu til hvørt valevnið. Stendur á jøvnum millum fleiri, verður beinanvegin umval eftir somu reglum, til eingin ósettur sessur er eftir.

8. stk.: Eykaaðalfundur verður hildin, tá ið nevndin ásetir tað, ella tá minst 1/4 av teimum limum, sum atkvøðurætt hava, skrivliga heita á nevndina við einum uppskoti, sum ynskt verður at viðgera.

9. stk.: Eykaaðalfundur skal verða hildin innan 4 vikur, tá ið nevndin hevur fingið eina slíka áheitan, og innkalling skal fara fram við minst 8 daga freist eftir somu reglum, sum eru galdandi fyri innkalling til vanligan aðalfund.

10. stk.: Tað, sum fyriferst á aðalfundi, verður fest í bók, sum fundarstjórin undirritar.

§ 5

Dagsskrá fyri vanligan aðalfund er hendan:

1. 1.       At velja fundarstjóra
   2.       Frágreiðing um virki felagsins farna árið
   3.       Grannskoðaður roknskapur verður lagdur fram til góðkenningar.
   4.       Uppskot til fíggjarætlan verður lagt fram og limagjald og innskot verða ásett.
   5.       Uppskot frá nevndini
   6.       Uppskot frá limunum
   7.       At velja nevndarlimir og tiltakslimir
   8.       At velja grannskoðara og tiltaksgrannskoðara
   9.       Ymist

2. stk.: Til tess at eitt uppskot frá limum kann verða viðgjørt á einum vanligum ársaðalfundi, skal tað verða nevndini í hendi í seinasta lagi 15. februar. Uppskot frá limum skulu verða umrødd í boðunum um aðalfundin.

§ 6

Í nevndini sita 5 limir, sum verða valdir fyri 2 ár í senn. Annaðhvørt ár fara lutfalsliga 2 og 3 limir frá, fyrstu ferð sambært lutakasti, síðan eftir hvussu leingi teir hava sitið. Limir kunnu verða afturvaldir.

2. stk.: Allir limir við atkvøðurætti kunnu verða valdir í nevnd

3. stk.: Tiltakslimir eru tveir, og er valskeið teirra eitt ár. Teir taka við, um nevndarsessur verður ósettur í skeiðinum.

§ 7

Nevndin skipar seg sjálv við formanni, næstformanni, skrivara og kassameistara og ásetur sjálv sína starvsskipan.

2. stk.: Nevndin er viðtøkufør, tá ið helmingur limanna er á fundi

3. stk.: Vanligur meiriluti ræður á nevndarfundi. Standa atkvøður á jøvnum, ræður atkvøða formansins.

4. stk.: Samráðingar á nevndarfundi verða at skriva í gerðabók.

§ 8

Nevndin hevur dagligu leiðsluna av felagnum og tekur bindandi avgerðir í málum felagsins.

2. stk.: Felagið verður teknað av formanninum einsamallum ella næstformanninum saman við einum nevndarlimi.

3. stk.: Nevndin kann seta lønt starvsfólk og áseta arbeiðsøki teirra.

4. stk.: Upptøka av størri lánum eins og keyp, søla ella veðsetan av fastari ogn krevur aðalfundarsamtykt.

§ 9

Nevndin setur niður undirnevndir, sum eftir hennara ella aðalfundarinnar áskoðan eru neyðugar, harundir eina breytnevnd og eina kappingarnevnd.

2. stk.: Á odda fyri hvørja undirnevnd stendur ein nevndarlimur, og nevndin skal góðkenna hinar limirnar í undirnevndini.

3. stk.: Nevndin gevur undirnevndunum setning og heimildir, og ásetur, hvussu virkast skal.

§ 10

Roknskaparár felagsins er álmanakkaárið.

§ 11

Fyri golfspælið í felagnum galda tær reglur, sum The Royal & Ancient Golf Club of St. Andrews hevur ásett, og harumframt tær lokalu reglur, sum nevndin við góðkenning frá Golfsambandi Føroya hevur ásett.

2. stk.: Nevndin skipar annars fyri tí, sum hon heldur verða neyðugt fyri at greiða spælið úr hondum og skipa fyri umráði felagsins. Verða ásettu reglurnar ikki hildnar, kann nevndin seta lim í karantenu ella, um misbrotið er álvarsligt og verður endurtikið, koyra hann úr felagnum. Henda seinna avgerðin kann ein limur tó altíð leggja fyri aðalfund, men stendur avgerð nevndarinnar við, til aðalfundurin hevur tikið støðu í málinum.

§ 12

Fyri at broyta hesar viðtøkur, og fyri at avtaka felagið, krevst at minst 2/3 av øllum limum við atkvøðurætti eru umboðaðir á aðalfundi, og at minst 2/3 av teimum hjástøddu limunum greiða atkvøðu fyri uppskotinum.

2. stk.: Um 2/3 av teimum limum, sum atkvøðurætt hava, ikki eru á aðalfundinum, men uppskotið tá fær 2/3 í meiriluta, skal nevndin í telduposti við minst 8 daga varningi kalla saman til eykaaðalfund, sum skal verða hildin innan 4 vikur eftir tann fyrra. Uppskotið er samtykt, um tað á hesum fundi fær 2/3 av atkvøðunum fyri, uttan mun til hvussu nógvir limir koma á fund.

§ 13

Verður felagið tikið av sambært reglunum í §12, tekur aðalfundur við vanligum meiriluta avgerð um, hvussu farast skal fram avtøkuni viðvíkjandi, harundir hvussu ognarviðurskiftini skulu greiðast.

2. stk.: Leypur nakað av, tá endaliga er gjørt upp, fellur tað til Reyða Kross. Soleiðis samtykt á stovnandi aðalfundi í Tórshavn tann 3. juli 1989 og broytt á ársaðalfundi tann 23. november 1990, 1. desember 2007, 9. mars 2013 og á eykaaðalfundi 7. juli 2018.