Bjarnvarður í Dali, kappingarleiðari, handar Ragnari Isaksen meistaraskapssteypin

Ragnar Isaksen prógvaði í dag, at hann er Føroya besti golfspælari. Tórshavnar Golffelag skipaði fyri felagsmeistarakapping á breytini á Glyvursnesi hetta vikuskiftið, og Ragnar Isaksen vann ein tryggan sigur í kappingini, sum eisini verður kallað óalmenna føroyameistarakappingin í golfi.

Talan var um slagspæl, har tað ræður um at brúka so fá sløg sum møguligt. Spæld vóru 36 hol yvir tveir dagar, og Ragnar brúkti 171 sløg. Sostatt endurvann hann felagsmeistaraskapin, sum hann eisini vann í fjør.

Nummar tvey í kappingini gjørdist Andreas F. Hansen við 177 sløgum, og nummar trý var Óskar Eiríksson við 178 sløgum.

Um tvær vikur verður hin meistarakappingin í felagnum. Talan er um holspæl, har sløgini ikki verða tald saman, men spælt verður eftir hvør vinnur flest einstøk hol.

Luttakararnir í felagsmeistaraheitinum í holspæli eru teir átta bestu í slagspælskappingini, og umframt teir tríggjar nevndu, verða luttakararnir í holspælskappingini hesir: Janus Norðberg 182 sløg, Per Poulsen 187, Palli Henriksen 193, Óli Edward Olsen 193 og Páll Kjærbo 195.

Størsta árliga kappingin hjá Tórshavnar Golffelag varð spæld á golfbreytini á Glyvursnesi í dag. Talan er um opnu kappingina BankNordik Open.

Talan er um eina kapping, har spælt verður við fullum handikappi, og tað vil í høvuðsheitum siga, at teir minni royndu leikararnar hava eins góðan møguleika at gera seg galdandi, sum teir leikarar, sum hava spælt í nógv ár.

Heili 28 spælarar vóru við í kappingini, harav tríggjar kvinnur.

Vinnari gjørdist ein av ungu spælarunu í felagnum, Jens Guttesen, sum fekk 40 sokallað stableford stig, sum so eisini førir við sær, at hann verður reguleraður tvey niður í handicappi til næstu ferð.

Nummar tvey gjørdist Andreas F. Hansen við 38 stigum, og nummar trý gjørdist Palli Henriksen, sum eisini fekk 38 stig. Teimum á baki komu Rógvi Mikkelsen, Ragnar Isaksen og Jón Niclasen.

Spælararnir spældu tríggir og tríggir, og skipað varð eisini fyri kapping millum hesi liðini, sum spældu saman. Liðið, sum kláraði seg best, var mannað við Jens Guttesen, Palla Henriksen og Suna Durhuus.

Per Poulsen sló nærmast holi á hol 2/11 og Jógvan Amonsson var nærmastur á holi 5/14.

Leygardagin tann 13. august 2016 verður skipað fyri BankNordik-Open golfkapping á golfbreytini á Glyvursnesi.

Kappingin verður skipað sum ein einstaklingakapping, sum samstundis eisini er ein liðkapping. Spælt verður við fullum handikappi.

Tær neyvu reglurnar eru lýstar aðrar staðni á hesi heimasíðuni.

BankNordik stuðlar kappingini við at lata øllum luttakarum eina eskju við BankNordik-bóltum. Harafturframt letur BankNordik trimum teimum bestu í einstaklinga-kappingini góðar vinningar.

Eisini verða vinningar latnir luttakarunum á vinnandi liðnum, umframt at aðrir smærri vinningar verða latnir eftir ávísum treytum í sjálvum spælinum.

Umboð fyri BankNordik letur vinnarunum vinningarnar eftir lokna kapping.

BankNordik ynskir við hesum at stuðla golfítróttini, sum fólk í øllum stigum á lívsleiðini kunnu luttaka í. Runt allan heimin er áhugin fyri golfítróttini sera skjótt vaksandi. Tey íðkandi ganga nógv, og mýkja samstundis so at siga alt likamið tá spælt verður.

Kappingin er fyri øll, sum hava eitt handikapp, sum er 54 ella lægri.

Tey, ið hava áhuga at luttaka, skulu senda eitt SMS til 258539 ella teldupost til: This e-mail address is being protected from spambots. You need JavaScript enabled to view it í seinasta lagi hóskvøldið tann 11. august kl. 20.00.

Luttøkugjaldið er kr. 50,00.

Kæru limir í Tórshavnar Golffelagi

Nevndin hevur arbeitt við einari ætlan at betra viðurskiftini á vøllinum, so tað verður betri at spæla og lættari at finna bóltin aftur. Vit síggja sera góð úrslit á farvegi 6, har ein partur av farvegnum er sligin soleiðis, at tað nú byrjar at líkjast einum verðuligum vølli. Í framhaldi av hesum arbeiði hava vit avtala við Lendisdeildina hjá Tórshavnar Kommunu at læna nakrar sláimaskinum, soleiðis at vit kunnu sláa nakað meira á ávísum økjum á vøllinum.

Tí fara vit at heita á limir felagsins at møta á Glyvursnesi leygarmorgunin komandi kl. 9. Vit bjóða morgundrekka og greiða frá, hvat gerast skal. Annars verður ábit sum dagurin líður. Vit rokna við at brúka allan dagin, so ætlaða arbeiðið kann gerast liðugt. Ætlanin er eisini at rudda á vøllinum og í felagshúsinum. Vit ráða til, at tit eru í arbeiðsklæðum og gummistylvum.

Vit heita á kvinnuligu limir felagsins um at taka sær av at rudda og vaska felagshúsið. Hetta arbeiðið kann neyvan byrja fyrr enn kl. 14.00.

Vónandi ber til hjá tær at møta, tí allur bati bøtur, nú vit fara undir ársins størstu kappingar, sum verða í august/september.

Væl møtt leygarmorgunin.

Við felagskvøðu

Nevndin